Mae rhifyn Mai yn llawn i’r ymylon o’r ysgrifennu craff arferol ar amrywiaeth o bynciau amserol. Mae Sioned Williams, a dreuliodd gyfnod y llynedd yn byw yn Cambridge, Massachusetts, yn esbonio pam y mae ffawd y brodyr sy’n cael eu hamau o osod bomiau Marathon Boston yn destun galar yr un mor ddwys yn y gymdogaeth â’r bywydau diniwed a ddinistriwyd gan y bomiau. Trafod y gwersi sydd i’w dysgu o’r epidemig o’r frech goch yn ardal Abertawe y mae’r Meddyg Plant Ymgynghorol, Dewi Evans, tra mae Bethan Wyn Jones, yn sgil y llifogydd diweddar, yn galw am ddeddfwriaeth i atal adeiladu ar y gorlifdir. Mae Bethan Kilfoil, Will Patterson, Deian Hopkin a Roy Thomas yn trafod agweddau ar deyrnasiad a gwaddol Margaret Thatcher gan gynnwys ambell agwedd annisgwyl. Theatr wleidyddol yw pwnc Gareth Miles, a phwer celfyddyd sydd dan sylw gan Marian Delyth hefyd, awdur colofn Fy Hoff Lun y tro hwn. Mynnwch gopi er mwyn darllen hyn oll, a llawer mwy.
 |
|
|
Rhifyn Ebrill allan yn awr |
 |
 |
 |
|
Efallai fod amser bwyta wyau Pasg drosodd ond mae yna lawer ichi gael eich dannedd ynddo rhwng cloriau’r rhifyn diweddaraf. Darllenwch farn y meddyg teulu Catrin Elis Williams am ad-drefnu gwasanaethau iechyd yng Nghymru. Mae Will Patterson yn trafod fel y mae’r Unoliaethwyr wedi bod yn codi bwganod am Alban annibynnol. Rhannu ei brofiad fel rhiant i blentyn dyslecsig y mae John Pierce Jones y tro hwn. Mae Esyllt Nest Roberts de Lewis, sy’n byw yn y Wladfa, yn trafod rhamant a realiti mewn delweddau o’r Batagonia Gymreig. Ym myd llên mae Tudur Hallam yn rhoi ei farn am gystadlaethau a pholau piniwn llenyddol tra mae Elin Llwyd Morgan yn galw am fwy o onestrwydd mewn adolygiadau o lyfrau Cymraeg. Trafod ein arferion siopa rhagrithiol ni fel Cymry y mae Chris Cope. Ac yn ei golofn wyddoniaeth mae Deri Tomos yn sôn am y profiad ysgytwol pan gredodd ei fod wedi gweld y dyfodol. Dim ond rhai o’r rhesymau i brynu Barn Ebrill. 
|
|
Rhifyn Mawrth allan yn awr |
|
|
|
|
Sut fyddwch chi’n croesawu’r gwanwyn? Gallech wneud yn waeth na mynd allan i brynu copi o’r rhifyn diweddaraf o Barn. Ymhlith yr erthyglau treiddgar arferol, mae gennym sawl un yn ymateb i ystadegau’r Cyfrifiad am y Gymraeg – gan Robat Trefor a Dafydd ab Iago, yn ogystal â darn Beca Brown, sydd ar y we. Eto’n berthnasol i ragolygon yr iaith, pam y mae papur gwyn Llywodraeth Cymru am fil datblygu cynaliadwy wedi dod dan lach rhai ymgyrchwyr? Dyna gwestiwn Emyr Lewis. A chwestiwn hefyd sydd gan Andrew Misell wrth droi ei olygon at Ewrop – ai peth da o angenrheidrwydd yw Ewrogarwch cynifer o genedlaetholwyr Cymreig o Saunders ymlaen? Mae cwestiwn arall eto wrth wraidd colofn Gareth Miles y tro hwn – pam y mae capeli Cymraeg heddiw mor ddiflas? Ac os nad yw hynny’n ddigon o gwestiynau i chi beth am roi cynnig ar ein Cwis Gwyl Ddewi, a chael siawns i ennill pecyn gwerth chweil o lyfrau amrywiol. 
|
|
|
Rhifyn Chwefror allan yn awr |
|
|
|
|
Mae wedi bod yn dywydd swatio yn y ty yn ddiweddar a pha ffordd well i wneud hynny nag yng nghwmni awduron difyr Barn? Yn ychwanegol at yr erthyglau a welir yma, mae Bethan Kilfoil yn ysgrifennu am y terfysgoedd diweddar ar strydoedd Belffast, Andrew Misell yn trafod dyfodol rhai o’r caeau rasio ceffylau yn sgil tranc un Henffordd a Bethan Jones Parry yn adrodd hanes yr unig bapur Sul Cymraeg i gael ei gyhoeddi erioed. Cewch hefyd ddarllen darnau dadlennol o gofiant newydd i R. Williams Parry gan Alan Llwyd a hynny ar ffurf llythyrau sy’n dangos y tensiynau mawr fu rhwng y bardd a’i gyflogwr sef coleg Bangor Myfyrdodau wrth glirio’i seler sydd gan ein colofnydd gwin, Shôn Williams, ac mae maes rygbi Murrayfield yn atgoffa ein colofnydd chwaraeon, Derec Llwyd Morgan, o ddigwyddiad brawychus yn ystod ei blentyndod. Rhesymau da i fachu eich copi o’r rhifyn diweddaraf – ac mae rhagor yn eich aros rhwng y cloriau! 
|
|
Rhifyn mawr y Nadolig a’r Flwyddyn Newydd allan yn awr |
|
|
|
|
Ydi, mae’r rhifyn dwbl wedi cyrraedd, ac mae’n llawn dop o erthyglau difyr. Rhagflas ohonynt yn unig a welir yma. Ymhlith rhai eraill, mae Daniel G. Williams yn sôn am ffilm sy’n ymwneud â chefndir Affricanaidd Barack Obama, ffilm a wnaed gan un sy’n hanner Affricanes a hanner Cymraes, a Bethan Kilfoil yn edrych ar y digwyddiad trasig sydd wedi dod â phwnc erthylu yn ôl i’r penawdau yn Iwerddon. Mae Roger Owen yn dweud pam y mae dramâu Gwenlyn Parry yn berthnasol o hyd a Derec Llwyd Morgan yn trafod ‘rygbi rigor mortis’. Gwaredu at ymgais Llywodraeth y Cynulliad i sensro Pobol y Cwm y mae ein colofnydd teledu, Sioned Williams – y ffaith i’r ymgais wallgof hon fethu sy’n esbonio’r mochyn daear joli ar ein clawr. Hyn oll ynghyd â stori newydd amserol gan Aled Islwyn, barn ein hadolygwyr am lyfrau a chryno-ddisgiau’r wyl, a llawer mwy. Nadolig Llawen a Blwyddyn Newydd Dda! 
|
|
|
|
|
<< Cychwyn < Yn ôl 1 2 3 4 5 6 7 8 Nesaf > Diwedd >>
|
|
Tudalen 1 o 8 |
