|
Prif ddigwyddiad gwleidyddol Cymreig y mis diwethaf fu ethol arweinydd newydd Plaid Cymru ac yn y rhifyn hwn cewch ddarllen ymateb rhai o’n colofnwyr i fuddugoliaeth Leanne Wood. ‘Cam beiddgar’ fu ei hethol, meddai Richard Wyn Jones ond yn ôl Chris Cope mae’r Blaid, drwy ddewis y ferch o Gwm Rhondda, wedi ‘dewis y llwybr i ddinodedd’. Mae Angharad Tomos yn ateb sylwadau Richard Wyn Jones am Gymdeithas yr Iaith yn y rhifyn diwethaf a Bethan Kilfoil yn cymharu sefyllfa’r iaith Wyddeleg â chyflwr y Gymraeg. Lleucu Siencyn, Prif Weithredwr Llenyddiaeth Cymru, sydd ar y soffa ar gyfer Cyfweliad Barn y mis hwn, yn trafod sut mae mynd â llenyddiaeth i’r priffyrdd a’r caeau – ar gyllideb sydd wedi’i rhewi. Ceir ysgrifau coffa i Emlyn Hooson a Mervyn Davies, erthygl yn ailgloriannu’r bardd a’r newyddiadurwr John Eilian, golwg ar wasg yr Alban, adolygiad o 'Gair ar Gnawd', oratorio newydd Pwyll ap Siôn a Menna Elfyn, a llawer iawn mwy. 
|
|
|
Yn y rhifyn Gwyl Dewi hwn, hanner canrif ers darlledu darlith Saunders Lewis Tynged yr Iaith, addas bod y Gymraeg a Chymreictod yn bwnc llosg mewn sawl erthygl. Mae’r awdur a’r newyddiadurwr Hywel Williams yn honni mai ‘ffantasi wrth-fodern’ yw siarad am gymunedau naturiol Gymraeg, a Richard Wyn Jones yn dweud bod angen mudiad iaith newydd. Yn ei gyfweliad cyntaf gyda Barn mae Ian Jones, pennaeth newydd S4C, yn sôn am yr her sydd o’i flaen ac am ei orffennol – gorffennol sy’n cynnwys y Trwynau Coch, mam-gu ddylanwadol ac esboniad ar y ffugenw ‘Tish’. Darllenwch farn ein colofnydd teledu newydd, Dafydd Fôn Williams, am arlwy diweddaraf y Sianel, a myfyrdod Dafydd ab Iago ar dewdra diarhebol y Cymry. Y tu hwnt i Gymru fach a’i phroblemau, mae Bethan Kilfoil yn trafod ymatebion pobl Iwerddon a Groeg i’w hargyfyngau economaidd a Luned Aaron yn disgrifio ymweliad â chartref plant yn un o ardaloedd tlotaf India. Hyn a llawer mwy ym misolyn gorau’r wasg Gymraeg. 
|
|
Rhifyn Chwefror allan yn awr |
 |
 |
 |
|
Cyfnod llwm o’r flwyddyn? Na ofidiwch – mae digon yn digwydd yn Barn i’ch cadw’n ddiddig drwy’r mis bach. Mae Richard Wyn Jones yn gondemniol o adolygiad mewnol Plaid Cymru, Alun Lenny’n pryderu am ddyfodol y mentrau iaith yn sgil toriadau, Andrew Misell yn llawenhau fod dyfodol cwrs rasio ceffylau Ffos Las yn ddiogel, a Dafydd Glyn Jones yn dychmygu beth fyddai barn Emrys ap Iwan am Gymru 2012 petai’n dod yn ôl heddiw. Tro Catrin Finch yw hi i gael ei holi yng Nghyfweliad Barn, mae John Emyr yn dweud pam y mae Oriel Bortreadau Genedlaethol yr Alban ar ei newydd wedd yn esiampl i Gymru, ac mewn cyfres newydd o’r enw ‘Fy Hoff Lun’ mae Luned Rowlands yn dweud sut y daeth Wil Cwac Cwac i fyw ar wal ei chegin. Arferion darllen plant sydd dan sylw gan Beca Brown, tra mae Bedwyr ab Iestyn yn dweud pam mae’n rhaid cael e-lyfrau Cymraeg. Mae priodas ar y gorwel i Chris Cope ac mae John Pierce Jones yn cofio’i gyfarfyddiad ‘bythgofiadwy’ gyda Brenhines ein Llên. 
|
|
|
Rhifyn Mawr Rhagfyr/Ionawr Allan Yn Awr |
|
|
|
|
Ydi, mae’r rhifyn dwbl wedi cyrraedd, yn llawn dop o erthyglau gwych. Bethan Kilfoil yn sôn am Arlywydd newydd Iwerddon, Tweli Griffiths yn cofio’i gyfweliad rhyfeddol gyda Gadaffi, a’r Dyn Mynd a Dwad yn ail-fyw ei daith ddiweddar ar draws yr Unol Daleithiau. Yn nes at adref, mae Dafydd Hughes yn dweud hanes CPD Bangor wrth iddynt ffarwelio â’u cartref hanesyddol yn Ffordd Farrar. Daw diwedd blwyddyn â chyfle i edrych yn ôl – Simon Brooks, Alun Wyn Bevan, Kate Crockett, Lowri Haf Cooke a Pwyll ap Siôn sy’n cloriannu gwleidyddiaeth, chwaraeon a chelfyddydau Cymru 2011. Ar nodyn Nadoligaidd mae Bethan Jones Parry yn olrhain hanes ‘Dawel Nos’, a Nia Roberts yn trafod mins peis. Rhaid ichi ddarllen Barn i gael barn ein hadolygwyr am lyfrau newydd y Nadolig – pa well canllaw wrth wneud eich siopa? Ac un rheswm da arall i ddarllen y rhifyn o glawr i glawr – er mwyn gwneud ein Cwis Nadolig a chael cyfle i ennill gwobr ardderchog! 
|
|
Rhifyn Tachwedd allan yn awr |
|
|
|
|
…ac mor llawn ag arfer o’r ysgrifennu gorau ar faterion cyfoes a’r celfyddydau. Mae Alwyn Roberts yn trafod ‘Problemau Prifysgol’ a Will Patterson yn beirniadu ‘ffyliaid cibddall’ Llafur yr Alban. Mae Gwyn Griffiths yn flin fod y Celtiaid yn cael cam gan raglenni hanes a Sioned Williams yn pryderu am effaith toriadau BBC Cymru ar ddarlledu Cymraeg. Ceir argraffiadau Luned Aaron o wyl gartwnau ryngwladol yn Ffrainc, golwg ar waith yr artist Martin Wenham, barn Megan Eluned Jones am y ‘broblem adolygu’, cip ar hoff stafell yr actores Delyth Wyn… a llawer mwy. 
|
|
|
|
|
<< Cychwyn < Yn ôl 1 2 3 4 5 6 7 8 Nesaf > Diwedd >>
|
|
Tudalen 3 o 8 |
